قطر الحياة قشاش
بتركب فيه ببلاش
بيقف ف كل محطة
خلق ف شنطها حاطة
حاجات مانفهمهاش
حاجات منعرفهاش
اللي حاطط همه
واللي محضّر سمه
واللي مخَبِي ضحكة
خايف ميضحكهاش
واللي حاطط أمل
يمكن يلاقي عمل
وطالب حاطط كتاب
جايبلو لكتئاب
واقف سرحان ع الباب
بيفكر ف اللي جاي
يسمع بياع الشاي
كوباية ومكلبظة
والعيب عيب محفظة
فاضية مفيهاش مليم
ربك بالسر عليم
وناس بكل خفة
شايله علي راسها قُفَّة
فيها بيض وصميط
وبين العربيات
تلقي ١٠٠ ألف عبيط
ورغم إنه بلاش
في عالم متسطحة
يمكن مبتوعاش
لأصول المصلحة
ويمكن واخدينها هواية
بيهربوا م الشواية
أصل مفيهوش تكييف
ومن امتي الغلابة
ليهم عندنا تصنيف
كل ف محطته
ينزل يعيش دنيته
والقطر لسه ماشي
آزح وميدراشي
إنه أكيد حيوصل
لمحطة الوصول
ويركن ع الرصيف
رصيف اللا معقول
كل راكب ينزل
وكل ماشي حيقف
دورنا ف القطر نمثّل
أدوارنا زي التُحف
ياريته ف يوم مايوصل
يتزحلق م القضبان
أرحم من حر عايش
والحزن ليه قضبان
هشام سليم
كنج العربي
شاعر الحرافيش
الإسكندرية مصر
