الست مخلوق طيب
حنيّن دمعه قريّب
مليانة بالحنان
وغيرتها ياناس جنان
علي أي واحدة تعيّب
كلمة حلوة تراضيها
وتنسي آهات ماضيها
والحب بيخليها
تقول حاضر وطيّب
إياك تلعب بديلك
تجيب مصيبة تشيلك
أو تصرخ في مواويلك
كل الأمراض تجيلك
ياخرابي علي ضَرْب البوز
ياخرابي لما تعوز
تخلي الدنيا جحيم
تبقي شيطان رجيم
لكن لو صنتها
أخلصت في حبها
طبطبت علي قلبها
تديك أيام عمرها
وتسوق ياباشا الدّفة
وحياتك أحلي زفّة
وميزان معدول الكفة
تنعم برقة وخفة
ف الجنة خدلك لفة
تبقي حياتك وسرك
وتعيش عمرين فوق عمرك
وصفة ومش حتخيّب
الست مخلوق طيب
حنيّن دمعه قريّب
هشام سليم
كنج العربي
شاعر الحرافيش
الإسكندرية مصر
