وحبه ملح ويا العيش
نغمسهم نبات راضيين
ولو نلبس ساعتها الخيش
قلوبنا سعيده ما بتبكيش
بحمد الله ونسيبحه
لسان شاكر يقول حامدين
وكان قله وجمبها زير
وعيش سخن وعسل وفطير
وجبنه قديمه وياهم
وبيت مليان بالخير
في وقت العوزه تلقاهم
وبيت من البوص وفرشه حصير
غطاه من الحب بيدفي
وجار للجار وحيط في الحيط
وصايا رسولنا بيوفي
من الفجريه تلقانا
قلوب بالذكر عمرانا
وسارحه بين كنايه وغيط
بتدعي ربها الرزاق
وتحلم بالحصاد وتشتاق
لكن دلوقتي ليه تايهيين
في دنيا قلوعها وحدانا
بترمينا وبيرها غويط
ايدين القدر عميانا
وبنفكر في مين مغلوب
وبنفكر في مين غائب
علي بعض بنستقوي
ونتباها مين الاقوي
وننسي الوصل ونضيع
سنين سبحنها م التقوي
......بقلم......
....منى محمد......