يِـبقَـى انتَ عبيط...!
***
من كلمات
الطبيب الشاعر المصري/ د. محمد رزق
***
يبقَـى انتَ عبيط ...!
لـو كنت فاكرني تِنِك وقليط ؟!
إكمني مااحِـبِـش قلنا وقال
سادد في ودانى من التخبيط
وف حالي باعيش ،
من غير تنتيش .،
من غير تهبيش ، بس بتخطيط
تأسرني البسمة الرايقة ياناس
وكتابي نضيف مافيهوش شخابيط
إكمِـن انا شاعر والإحساس
دايما بياخدني ف بحر غويط
لو شفت الناس تاكل في الناس
أو شفت حياتهم فى اللخابيط
باستغرب حال الدنيا عشان
كل الدلاديل لابسين زعابيط
زى البلاليص واخدين ( قصاقيص)
ويطاطوا لكل زعيط ومعيط
والمال ميهمش ولابيدوم
والستر أهم من التنطيط
والدنيا تساوي مافيش ، ونعيش
نتسابق فيها ، نهيص ونظيط
والآخر ناخد قطنة ياناس
والرب يحاسب بالتظبيط
مكتوب في كتابك عامل إيه
لو شر حـتاخُد بالشلاليط
لو خير تِـتهَـنّى وتِـلقَـى نعيم
في الجنة الخير ملهوش تفريط
عايش في أمان ، لكن إنسان ،
جـوّايا حنان ، ومسالم جدا بس حويط
واقدر واتخانق وَيّـا الجان
لـو مَـس كرامتي بطرف الخيط
وانصف مظلوم ، واعطي المحروم ،
وابخل بالكلمة على القراميط
شاعر وطبيب ، مااعرفش العيب
وبحب العيشة بشكل بسيط
واللي يحبوني يقولوا ملاك
والكاره غيرته تشوفني قليط
عمري ما باهتم بأي كلام
أو ليه وبكام ،
ومأمن نفسي من الوطاويط
فاهم موزون ، عاقل مجنون
معرفشِ أخون وعَـدِوّي عبيط .
***
لاتهتم بمن يكره ويحقد ويخون ، وركز مشاعرك مع أصحاب القلوب الجميلة فإنهم كنوز نادرة في زمن المصالح والهرم المقلوب.
الطبيب الشاعر/ د. محمد رزق
***