( تعيش وتفتكرني )
ما كنت أصدَّق انك غدَّار و كدَّاب
طِلعِت خِيبتي ما وَرَدَت فى كتاب
كفاية....لِسَّا هتقول ايه؟
تعيش وتفتكرني
****
و عشانك لسَّا بَستَنَّى الصباح
وسامحتك على كل اللى راح
مفيش أعز منك أتمَسَّك بِيه
تعيش وتفتكرني
****
معَاك ....ماخلِّيت ورَايا. ورَا
حزِنت و آدِى صِحِّتي مِتدَهورَه
لمَّا هتُغدُر ، جَرِّيتنِي ورَاك ليه؟
تعيش وتفتكرني
****
تعبانَه واسعدك حبيبى يا عايق
واموت عشانَك ، لو أشوفك مضَّايق
ده كله مَعنَاه ايه؟
تعيش وتفتكرني
****
نسيتنى انهارده ايه...كفايه
ظلمتني ، وايه آخرة الحكايه؟
عرفت السعاده تمنها ايه؟
تعيش وتفتكرني
****
ياريتك ماتِنسَى فرحتنا في البدايه
وصلنا عِنادَك لأسوأ نهاية
لسا فاضل ايه أبكى عليه؟
تعيش وتفتكرني
****
وحياة القلب اللى ضِحِكت علِيه
وفى لحظة السعادة غدَرت بِيه
لمَّا نبضي وقِف كسِبت ايه؟
تعيش وتفتكرني
****
تحمَّلت فى حُبَّكْ مَرارِة العذَاب
ومعَاك عرفت مَعنَى العِيشَة الهِبَاب
دِه جَزاء الاخلاص يابِيه؟
تعيش وتفتكرني
****
كل صُبح ، مِشْ طايقَه هُدُومِي
وكُل مسا ، تزِيد الآه ، وهمُومِي
حفضل بالليل اتحَسبَن علِيه
أبَطَّل لمَّا يفتكِرني !!
****
وتعيش وتفتكرني
د. صلاح شوقي.............مصر
باذن الله
الثلاثاء... (حب تحت المطر )